ಸಂಪಿಗೆ ಮರ

ಅದೊಂದು ಹಳೇ ಶಾಲೆ. ನೂರು ವರ್ಷ ತುಂಬಿದ ನೆನಪಿಗೆ ಕಳ್ದ ವರ್ಷ ಇಲ್ಲಿ ಶತಮಾನೋತ್ಸವ ಸಮಾರಂಭ ಕೂಡ ಮಾಡಿದ್ದೊ. ಈ ಶಾಲೆ ಗೇಟ್ ಹತ್ರ ಒಂದು ದೊಡ್ಡ ಸಂಪಿಗೆ ಮರ ಉಟ್ಟು. ಬಹುಶಃ ಈ ಸಂಪಿಗೆ ಮರಕ್ಕೆ ಆ ಶಾಲೆಯಷ್ಟೇ ವಯಸ್ಸಾಗಿರುದೋ ಏನೋ.. ಆ ಸ್ಕೂಲ್ನ 2ನೇ ಕ್ಲಾಸ್ ಹುಡುಗರು ನಿಂತ್ಕಂಡ್ ಸೂಸು ಮಾಡುದು ಇದೇ ಮರದ ಕೆಳಗೆ ! ಹಂಗಾಗಿ, ಎಲ್ಲಾ ಕಡೆ ಹಸಿರು ಹುಲ್ಲು ಕಂಡರೆ ಸಂಪಿಗೆ ಮರದ ಬುಡಲಿ ಹುಲ್ಲು ಒಣಗಿ ಹೋಗಿದ್ದದೆ. ಇಲ್ಲೂ ಹಸಿರು ಕಾಣೋಕುತೇಳಿರೆ ಬೇಸಿಗೆ ರಜೆ ಬಾಕು ಅಷ್ಟೇ.. ! ಮರದ ಮೇಲೆ ತುಂಬಾ ಥರದ ಪಕ್ಷಿಗ ಗೂಡು ಕೂಡ ಕಟ್ಟಿಕೊಂಡೊಳೊ.
ಈ ಸಂಪಿಗೆ ಮರ ವರ್ಷಕ್ಕೆ ಒಮ್ಮೆ ಹೂ ಬಿಟ್ಟದೆ. ಆಗ ನೋಡೊಕು ಇದ್ರ ಪೊರ್ಲುನ...ಇಡೀ ಮರಕ್ಕೆ ಬಿಳಿ ಬಟ್ಟೆ ಹಾಸಿದಂಗೆ ಇದ್ದದೆ. ಸುಮಾರು ಒಂದು ಕಿಲೋ ಮೀಟರ್ ದೂರದ ವರೆಗೆ ಘಮಘಮತಾ ಪರಿಮಳ ಹರಡಿದ್ದದೆ. ಹೂ ಬಿಟ್ಟಿರ್ಕಾಕನ ಈ ಮರ ತುಂಬಾ ನೋವು ತಿಂದದೆ. ಟೀಚರ್ಗೆ ಕೊಟ್ಟು ಅವ್ರನ್ನ ಖುಷಿಪಡಿಸಿಕೆ ಸಣ್ಣ ಮಕ್ಕಳಿಗೆ ಹೂ ಬೇಕು. ಇನ್ನು ಸ್ವಲ್ಪ ದೊಡ್ಡ ಹೈದಂಗ ಆದ್ರೆ, ಅವು ಲೈನ್ ಹೊಡಿವ ಗೂಡೆಗಳಿಗೆ ಕೊಡಿಕೆ ಬೇಕು. ವಯಸ್ಸಾದವ್ಕೆ, ದೇವಸ್ಥಾನಕ್ಕೆ ತಕ್ಕಂಡ್ ಹೋಕೆ ಹೂವು ಬೇಕು. ಆದ್ರೆ ಕುಯ್ಯುದು ಹೆಂಗೆ ?  ಹೇಳಿಕೇಳಿ ಇದು ಭಾರೀ ದೊಡ್ಡ ಮರ. ಯಾರಿಗೂ ಹತ್ತಿಕೆ ಆಲೆ. ಗಳು ತಕ್ಕಂಡ್ ಬೀಳ್ಸುನೋತೇಳಿರೆ ಅಷ್ಟು ದೊಡ್ಡ ಗಳು ಕೂಡ ಸಿಕ್ಕುಲ್ಲೆ ! ಹಂಗಾಗಿ ಹೂವು ಬೇಕುತೇಳವು ಕಲ್ಲು ಹೊಡ್ದು ತಮ್ಮ ಆಸೆ ತೀರಿಸಿಕಂಡವೆ. 10 ಕಲ್ಲುಗಳಲ್ಲಿ 1 ಕಲ್ಲು ಮಾತ್ರ ಹೂವಿಗೆ ತಾಗಿದೆ. ಉಳ್ದ ಕಲ್ಲುಗಳ ಪೆಟ್ಟು ಎಲ್ಲಾ ಈ ಪಾಪದ ಮರಕ್ಕೆನೇ ! ತನ್ನ ಜೀವನಲಿ ಇಂಥ ಅದೆಷ್ಟು ಪೆಟ್ಟು ತಿಂದುಟ್ಟೋ ಏನೋ... ಆದ್ರೂ ಪ್ರತೀ ವರ್ಷ ನಗಾಡ್ತನೇ ಮರದ ತುಂಬಾ ಹೂ ಅರಳಿಸಿದೆ ! ಆದ್ರೆ ಬರ್ವ ವರ್ಷಂದ ಈ ಮರಲಿ ಹೂ ಸಿಕ್ಕುಲೆ !

ಶಾಲೆ ಶತಮಾನೋತ್ಸವ ಮಾಡ್ದೊ ಅಲಾ.... ಆಗ ಹಳೇ ವಿದ್ಯಾರ್ಥಿ ಗಳ ಕೈಯಿಂದ ತುಂಬಾ ಡೊನೇಷನ್ ಕಲೆಕ್ಟ್ ಮಾಡಿದ್ದೊ. ಹತ್ತಿರ ಹತ್ತಿರ ಒಂದು ಕೋಟಿ ರೂಪಾಯಿ ದುಡ್ಡು ಸಂಗ್ರಹ ಆಗಿರುದು. ಈಗ ಅದ್ರ ಅರ್ಧದಷ್ಟು ದುಡ್ಡು ಉಳ್ಕೊಂಡುಟ್ಟು. ಅದನ್ನ ಹೆಂಗಾರೂ ಮಾಡಿ ಖರ್ಚು  ಮಾಡೋಕು ನೋಡಿ, ಅದ್ಕೆ, ಒಂದು ನಾಲ್ಕು ರೂಂ ಕಟ್ಟಿಸಿರೆ ಹೆಂಗೆತಾ ಒಬ್ಬ ಕಮಿಟಿ ಮೆಂಬರ್ಗೆ ಸ್ನಾನ ಮಾಡಿಕಾಕನ ತಲೆಗೆ ಐಡಿಯಾ ಹೊಳ್ತ್. ಅದ್ನ ಉಳ್ದವ್ರ ತಲೆಗೂ ತುಂಬಿಸಿತ್. ಈಗ ಇರುವ ರೂಂಗಳೇ ಮಕ್ಕ ಇಲ್ಲದೆ ಬೀಗ ಹಾಕ್ಕಂಡ್ ಧೂಳ್ ಹಿಡ್ಕಂಡ್ ಬಿದ್ದಟ್ಟು. ಅದ್ರ ಜೊತೆಗೆ ಇನ್ನೂ ನಾಲ್ಕು ರೂಂ ಕಟ್ಟಿಕೆ ಕಮಿಟಿಯವು ತೀರ್ಮಾನ  ತಕ್ಕೊಂಡೊ. ಮತ್ತೊಬ್ಬ ಮನೆಹಾಳ ಇನ್ನೊಂದು ಐಡಿಯಾ ಕೊಟ್ಟತ್... `ಆ ಸಂಪಿಗೆ ಮರನ ಬುಡ ಸಮೇತ ಕಿತ್ತು ಹಾಕನ. ರೂಂಗಳ್ನ ಕಟ್ಟಿಕೆ ಜಾಗ ಸಿಕ್ಕಿದೆ. ಕಿಟಕಿ ಬಾಗಿಲು ಮಾಡಿಸಿಕೆ ಮರನೂ ಸಿಕ್ಕಿದೆ.' 
ಹಂಗೆ ಆ ಸಂಪಿಗೆ ಮರಕ್ಕೆ ಈಗ ಕೊನೆಗಾಲ ಬಂದು ಮುಟ್ಟಿಟ್ಟು. ಈಚಪ್ಪಾಚಾರಿ ದಿನಾ ಗರಗಸಕ್ಕೆ ಅರ ಹಾಕಿ ಹಾಕಿ ಹರ್ತ ಮಾಡಿ ರೆಡಿಯಾಗಿ ನಿಂತುಟ್ಟು. ಯಾಗ ಮರ ಬೀಳಿಸಿವೆ ಗೊತ್ಲೆ.... ಮರ ಬಿದ್ದ ಮೇಲೆ ಅಲ್ಲಿ ಗೂಡು ಕಟ್ಟಿಕಂಡಿರ್ವ ನೂರಾರು ಪಕ್ಷಿಗ ಇನ್ನೆಲ್ಲಿ ಹೋದವೆ ? ಅದು ಬಿಡಿ, ಎರಡನೇ ಕ್ಲಾಸ್ ಹೈದಂಗ ಇನ್ಯಾವ ಮರದ ಬುಡಲಿ ಸೂಸು ಮಾಡಿವೆ ? ಎಷ್ಟು ಬುದ್ಧಿಗೇಡಿಗಳಪ್ಪಾ ಈ `ದೊಡ್ಡವು' ?

- `ಸುಮ'